MU LEKA KITCHEN (YADDA AKE PIZZA)

Yadda Ake Hada Pizza a Gida

 Kayan hadi

· Filawa

· Gishiri

· Yis

· Man zaitun

· Manshanun kanti (Cheese)

· Mayonnaise

· Kayan kamshi

· Tumatir da farar albasa da koren tattasai

· Tsokar kaza

Yadda ake yi:-

Da farko za a jika yis da ruwan dumi kamar tsawon minti 10, sai ki zuba gishiri da man zaitun. Sannan sai ki kara filawa a cikin wannan ruwan yis din ki kwaba har sai ya yi tauri. Idan ma kika ji shi ya yi ruwa ko laushi sosai sai ki kara fulawa don yayi tauri. 

Daga nan sai ki rufe ki bar shi ya hau zuwa mintina 30. Idan ya hau (kumbura) sai ki sami farantin gashi ki juye filawar a ciki sannan ki sanya a cikin oben ki gasa ki bar shi tsawon mintuna biyar.

Sai ki yanka tumatir da farar albasa da koren tattasai kanana. Sai ki koma wurin fulawarki ki duba idan ta gasu sai ki fito da ita. Sannan ki dauko kayan tumatir din da kika yanka sai ki zuzzuba akai da dan garin kayan kamshi ki barbada. 

Sai ki sami tsokar naman kazarki da kika yanka kanana tare ki zuzzuba akai. Sannan sai ki kawo mayonnaise ki yaryada akai. Sai ki zo ki rufe samansa da manshanun kanti (chease). Sanann ki mayar cikin abin gashin (oven) don ya kara gasuwa. Za ki ji yana kamshi sosai sai ki fito da shi daga ciki shi ke nan Pizza ta yi sai ci.